Eth 16 d’abriu celebrèrem eth dia de Pòrtes Dubèrtes en tot daurir era escòla ath nòste pòble. Es escolans d’educacion infantila mostrèren ara comunitat educatiua eth resultat deth sòn projècte.
Pairs, familhars, vesins…coneisheren de prumèra man tot eth procés e tanben poderen gaudir damb eri de moments de jòc
Dempús de hèr era nòsta bastissa, conversèrem sus es causes qu’auíem aprenut. Bères reflexions des escolans/es son:
Atau escriueren es mès grani d’infantila!!!!!
Ath començament deth projècte pensèrem uns requits qu’auie d’auer era nòsta caseta e en acabar eth projècte les guardèrem e…
Un còp acabada era nòsta caseta, analisam se complís es requisits qu’auíem acordat en un principi e la milhoram: recobrim era façana damb papèr d’embalar entà que quède mès uniforme, metem flors enes hièstres, un barrat…
Atau mos a quedat de POLIDA!!!!
Era avaloracion finau mos a ajudat a milhorar eth nòste projècte e iniciam as escolans ena cultura dera autoavaloracion.
Fin finau auem arribat ath producte finau : Bastir ua caseta de carton laguens dera escòla entà poder-i jogar es dies de mau temps.
Dempús de fòrça trabalhar e practicar, es escolans an un nau espaci a on s’ac passen d’aquerò mès ben en tot jogar.
An aprenut quini son es materiaus damb es que se bastís ua casa, es sues parts, condes restacadi damb eth projècte , concèptes de geometria, atau coma er aqueriment d’abilitats sociaus: era importància dera cooperacion, eth valor deth dialòg en tot respectar opinions, potenciar eth pensament critic e torns de paraula . E tanben tot eth trabalh d’autonomia personau e relacionau.
Eri se mòstren fòrça orgulhosi dera sua creacion e demanen tot soent d’anar-i a jogar. Amassa o individuaument se divertissen, compartissen joguets e airines, desvolopen eth jòc simbolic ath maxim….e non se cansen jamès.
Des der airau d’anglés, participèrem en projècte en tot trebalhar eth conde des tres porcèths que tanben ac hègen en aranés. D’aguesta manèra, aprenerien eth vocabulari restacat damb era casa en anglés.
Entà introdusir era activitat, visualizèrem eth conde “The three little pigs” e a compdar d’aguest, es escolans trabalhèren eth vocabulari restacat damb era casa.
Apreneren coma se criden es materiaus damb es qu’es porcèths bastissen es cases, es sues parts principaus e eth vocabulari basic deth conde.
Ua auta activitat, siguec representar oraument eth conde, en tot practicar es expressions basiques deth conde.
Era activitat siguec plan motivadora pr’amor que les agrade fòrça enténer un condes que ja coneishen, mès en ua auta lengua, er anglés.
De totes manères, mos manquèren sessions entà consolidar mès prigondament eth vocabulari e expressions.
Entà participar directament en projècte “Bastim!” auem junhut es airaus de lenguatge musicau e educacion en valors en tot bastir un libre fòrça especiau, gigant e manipulatiu sus era casa des nòtes musicaus.
En prumèr lòc, adaptèrem eth conde “Por cuatro esquinitas de nada” en version musicau, ei a díder, es personatges son es nòtes musicaus e eth silenci.
Ena prumèra session, expliquèrem eth conde ara mainadèra sense eth finau e es mainatges pensèren era solucion ath problèma. Aquerò les hèc a reflexionar e hérem un petit debat sus es valors aprenudi.
Ena darrèra session, es mainatges de P5 expliquèren eth conde as auti mainatges de P3 e P4.
Fin finau, hèrem un jòc entà formar paraules restacades damb valors e eth nòm des nòtes e ac pengèrem en ua paret dera escòla. En jòc, cau completar es paraules damb eth nòm des nòtes, per exemple: damb era nòta “Sol” formam era paraula “Solidaritat”.
En conclusion, eth balanç d’aguesta part deth projècte a estat fòrça positiu respècte as resultats e motivador entàs mainatges. Era participacion des escolans a estat activa e an gaudit creant, opinant e cercant solucions as problèmes plantejadi.
Era metodologia qu’auem utilizat entà realizar eth projècte Bastim!! ei integradora, motivadora, fomente er aprenedissatge significatiu e, sustot, eth cooperatiu.
Es escolans an trabalhat tant en petit grop, grop classe e grops internivèus depenent dera activitat a realizar. D’aguesta manèra, auem potenciat era atencion ara diuersitat.
Eth papèr des mèstres a estat de guida en tot prepausar preguntes claus a on era mainadèra d’infantila auie d’apréner a pensar e encaishar es contenguts naui damb es contenguts previs, en tot modificar eth sòn hilat de coneishements.
En un començament siguec un shinhau dificil era organizacion, arribar a acòrds de coma calie plaçar es caishes, mès a pòc a pòc cada un anèc trapant eth sòn ròl laguens deth grop.
Fin finau es parets anèren pujant e er objectiu s’artenhec.
Es nòsti companhs/es e familhes an responut fòrça ben ara nòsta demanda de caishes de carton. Auem un pialèr!!
Entà familiarizar-mos damb aguest materiau auem dedicat un parelh de sessions a jogar liurement damb es caishes en tot hèr construccions fòrça divertides e creatives.
Ja vam escauhant motors tà començar era nòsta bastissa!
Entà conseguir er objectiu, es escolans/es pròven damb caishes diuèrses, sagen de trapar mesures parières, bastissen parets e dempús les esbaucen perque non son uniformes, modifiquen era amplada dera base, investiguen quina ei era milhor opcion tà plaçar ua humenèja, parlen de coma van a hèr es hièstres…..
Tot damb era uelhada atenta dera mèstra que hè preguntes, demane ipotèsis, plantege naus rèptes, favorís era convèrsa…. entà que toti expressen es sues opinions.
Es caishes damb tapa enganchada serviren entà hèr hièstres. Ua caisha en forma de cilindre serie era humeneja. Era caseta se quedèc sense pòrta pr’amor qu’arribèrem ara conclusion qu’ère massa difícil tà nosati de bastir-la.
Fin finau, la forrèrem damb papèr d’embalar iranja, diboishèren flors entara façada e retalhèren ua tanca entà entornejar-la.
Cada mainatge e mainada s’a convertit en constructor deth sòn pròpi aprenedissatge.
Sens dubte, aguesta activitat les a ajudat a auançar enes coneishements geometrics basics: orientar-se, hèr estimacions de formes, distàncies, hèr apreciacions, distribuir es objèctes en espaci… que poiràn aplicar en d’auti àmbits.
Un còp arremassades es caishes de carton de disparières formes, mesures e colors decidírem que serien mès polides pintades.
Protegírem es taules e eth solèr, mos pugèrem es manges, escuelhérem es colors e ja èrem prèsti entà començar a decorar. Damb concentracion maxima decorèren sense deishar espacis uets.
Descorbírem qu’era pintura sautaue un còp seca enes lòcs a on auíem metut cinta adesiva entà barrar-les. Alavetz, acordèrem que ja non pintaríem mès es caishes pr’amor qu’estarien a miei pintar. Ara seguida, pensèrem qu’ua bona solucion serie forrar era casa, un còp acabada, damb papèr d’embalar de color.
Aprenérem a flexibilizar eth nòste pensament. Mos calèc cambiar era idia iniciau en tot parar-nos a pensar, escotar d’autes opinions e arribar a un acòrd.
En definitiua, des errors tanben s’apren!
 |
 |
.
