Entà participar directament en projècte “Bastim!” auem junhut es airaus de lenguatge musicau e educacion en valors en tot bastir un libre fòrça especiau, gigant e manipulatiu sus era casa des nòtes musicaus.

En prumèr lòc, adaptèrem eth conde “Por cuatro esquinitas de nada” en version musicau, ei a díder, es personatges son es nòtes musicaus e eth silenci.

Ena prumèra session, expliquèrem eth conde ara mainadèra  sense eth finau e es mainatges pensèren era solucion ath problèma. Aquerò les hèc a reflexionar e hérem un petit debat sus es valors aprenudi.

Ena dusau session, tornèrem a explicar eth conde e cada escolan ne hèc un diboish. Ara seguida, dancèren e cantèren era cançon deth conde “Yo tengo una casita”.

Ena tresau session, comencèrem a bastir eth conde: pintèren damb pintura es letres deth títol, era casa e es personatges (nòtes e silenci).

Ena darrèra session, es mainatges de P5 expliquèren eth conde as auti mainatges de P3 e P4.

Fin finau, hèrem un jòc entà formar paraules restacades damb valors e eth nòm des nòtes  e  ac pengèrem en ua paret dera escòla. En jòc, cau completar es paraules damb eth nòm des nòtes, per exemple: damb era nòta “Sol” formam era paraula “Solidaritat”.

En conclusion, eth balanç d’aguesta part deth projècte a estat fòrça positiu respècte as resultats e motivador entàs mainatges. Era participacion des escolans a estat activa e an gaudit creant, opinant e cercant solucions as problèmes plantejadi.