6) ESCRITURA D’UA NÒTA

Aguesta activitat ges deth besonh d’informar as familhes e as companhs de primària deth nòste projècte e demanar era sua collaboracion tà conseguir fòrça caishes tà poder bastir era nòsta caseta. Es escolans de P5 son es encargadi d’escríuer una nòta.

Eth procés a seguir a estat:

  • Escritura collectiua deth messatge dera nòta ena pissarra (P5)
  • Observacion de quines parts a ua nòta tà comprovar se era nòsta ei corrècta.(P5)
  • Correccion collectiua dera nòsta nòta ena PDI en tot híger es parts que mos manquen (P5)
  • Lectura guidada dera nòta elaborada pes escolans de p5 (P3/P/4)
  • Observacion des parts dera nòta e identificacion de cada part damb un color diferent
  • Escritura dera nòta individuau tàs familhes:
    • P5 escriu tota era nòta
    • P4 complète bèra part: destinatari, adiu, signatura
    • P3/ solet signatura
  • Elaboracion dera nòta tàs nòsti companhs/es de primària en tot aprofitar era nòta tàs familhes e cambiant eth destinatari e era signatura.

Un còp era nòta tàs companhs ei prèsta hèm tres grops (en cada grop i a escolans des tres edats) entà anar a explicar en C.Iniciau, C.Miei, e C.Superior eth sòn contengut.

Damb era escritura d’aguesta nòta an aquerit naui coneishements e les a aportat estrategies que poiràn méter en practica ena escritura d’auti tèxtes. E non solet ac an hèt damb eth sòn trabalh individuau ena activitat, senon tanben en tot observar era guida qu’a hèt era mèstra en tot eth procés e en tot participar activament damb es companhs/es enes convèrses

 

 

 

5) CASES DE PÈCES DE PLASTIC.

Dempús  de veir eth modelatge per part des mèstres de coma se pòt bastir ua casa, les deishèrem pèces granes as de P3 e  pèces petites de plastic (tipe Lego) as de P4 e P5 entà que bastissen eri es sues pròpries casetes.

Les acorropèrem en petiti grops eterogeni entà que trabalhèssen de manèra cooperatiua, que parlessen, qu’arribèssen a acòrds, on cadun poguesse aportar es sues potencialitats e èster responsable deth sòn pròpri aprendissatge, que non siguesse un trabalh individuau.

Es procèssi e es resultats sigueren diferents en foncion des persones que compausauen es grops, mès ua causa coincidic en toti: pendent aguest ahèr er ambient siguec de concentracion maxima.

Campatz es imatges…


Es mainatges e mainades an hèt es sues pròpies casetes e, sens dubte, er aprendissatge aquerit per miei dera observacion en modelatge les a ajudat fòrça.

4) MODELATGE DAMB PÈCES DE PLASTIC GRANES.

Entà començar, mos amassèrem toti es escolans d’educacion infantila en gran grop (24 escolans) e es mèstres hérem ua casa damb pèces granes de plastic.

En prumèr lòc, en tot parlar damb eri, decidírem era mesura dera planta. Parlèrem des nocions “de naut tà baish”, ”de baish tà naut”, etc. Quedèc clar qu’era bastissa se començarie de baish tà naut.

Dempús, quan ja auíem pujat tres hilères, mos encuedèrem qu’es pèces non mos arribarien entà acabar-la tota. La des·heiguérem e tornèrem a començar.  Reflexionèrem sus eth hèt d’apréner des nòsti  errors, coma mos auie passat a nosati, e que non passe arren per enganhar-se.

En moment de hèr es hièstres, expliquèrem coma se dèishen es uets e se seguís era paret pes costats.

Fin finau, eth losat se hèc inclinat coma ua escala e se ramplic damb eth carton des ueus.

 

3) DE QUIN MATERIAU BASTIRAM ERA NÒSTA CASETA?

A compdar d’ua convèrsa de classa, es escolans escuelhen de quin materiau bastiràn era sua caseta. Aquesta siguec era sua convèrsa:

– De quin materiau la poiríem hèr? un materiau que sigue facil de trapar, de manèra que nosati le podéssem manipular…

– La poiríem hèr de husta! Coma eth mèn pare trebalhe en ressèc…

– Plan ben! A viatges, vedem cases de husta. Mès era husta pese molt tà nosati  e, a còps, i a estères que mos les poiríem clauar.

– De metau…

– Eth metau ei un materiau que se hè a servir en bèth moment en bastiment d’ua casa. Mès d’on le treiram eth metau? E qué le passe ath metau?

– Qué pese molt!

– Tanben la poiríem hèr de papèr….

– Ei vertat, ena escòla n’auem fòrça de papèr, mès …

– Non tierie…

– Clar. Damb eth papèr non poiríem bastir es parets, non tierie. Non a consisténcia.

– Poiríem trèir era caseta de plastic que i a dehòra en pati e plaçar-la laguens dera escòla!

– Sabetz coma se sosten era caseta de plastic en pati petit?

– Ei clauada damb uns cargòlhs molt gròssi.

-Òc. Per motius de seguretat ei clauada en tèrra pr’amor que, senon, en tot calar-se-i laguens se vos poirie quèir dessús e serie perilhós. E lo de madeish passarie se la placèssem laguens enes classes, enes correders o ena sala. Cau clauar-la en un lòc e nosati pensam en bastir ua casa tà quan hèsque mau temps e non podésquem gésser. Que se pogue montar e desmontar quan convengue.

– La poiríem hèr d’aguest materiau…

– E coma se ditz aguest materiau?

– Carton!

– Plan ben! Quina bona idia! Se poirie hèr de carton.

 

2) BASTIM!!!

Eth nòste projècte se ditz Bastim!!! e s’amie a tèrme en Educacion Infantila.

Aguesta idèa gessec deth besonh der escolanat de jogar laguens deth centre en ua caseta parièra ara qu’auem en pati, pr’amor qu’en iuèrn hè mau temps fòrça dies e non i pòden gésser.

Un còp trigat eth leit motiv, es mèstres mos amassam en ua coordinacion setmanau de dues ores, a on debatim e planificam es activitats que s’amiaràn a tèrme en tot englobar toti es airaus deth curriculum (comunicacion e lenguatges, descubèrta d’un madeish e descubèrta der entorn).

 

1) QUI ÈM? Escòla Sant Ròc

Òla, companhs e companhes!

Èm es mèstres dera escòla Sant Ròc de Bossòst, un pòble dera Val d’Aran. Eth nòste centre a ath torn de 80 escolans.

Coma docents, auem fòrça interès en implementar eth trabalh per projèctes e crear ua linha d’escòla basada en aprenedissatge competenciau. Ei per aquerò que volem formar part der “Hilat de competéncies basiques”

Enguan, eth projècte s’amiarà a tèrme en Educacion Infantila e l’auem titolat BASTIM!!!