Pendent aguesta longa dimenjada, es nòsti porics decidiren que volien conéisher eth mon e comencèren a picotar es ueus tà auer ua naua vida dehòra.

Eth deluns peth maitin, mos trapèrem fòrça ueus picotadi e enteníem as porics piular laguens deth ueu… eth moment que s’apropaue. Quan tornèrem pera tarde mos trapèrem tres polidi porics neri. Neri? òc, aguesta siguec ua des nòstes suspreses. Es ueus èren de garies grises, atau donc, es nòsti porics son neri.

Quan tornèrem de cap ath ser, dus porics mès auien neishut. Èren fòrça banhadi laguens dera incubadora. Demorèrem a que se shuguèssen tà passar-les ara caisha qu’auíem premanida tamb ua lum que les da calor. Totes emocionades, mo n’anèrem a dromir, en tot pensar qué passarie pendent era net e qué diderien es escolans eth dimars quan arribèssen ena escòla.

Aué, dimars peth maitin, era mainadèra a vist tres poricons acabadi de nèisher laguens dera incubadora e tres ueus mès picadi. Demoram que pendent eth dia d’aué se decidisquen a gésser.

Es cares de felicitat e emocion des escolans mos an hèt gòi. Es sòns porics auien neishut e an començat a hèr ipotèsis de coma auien trincat era casquelh deth ueu, quin auie neishut prumèr, quin serie eth pròplèu ueu en trincar-se… Era discussion a arribat ena classa, relacionauen es causes que les auien explicat e qu’auien aprenut tamb era realitat deth neishement des porics…

A estat un moment d’aprenedissatge, de jòia, de realitat en veir nèisher uns èsters vius ena classa.

Demoram tamb impaciéncia qu’es auti ueus se trinquen e qu’auesquem lèu mès porics. De moment, ne portam ueit.

Seguiram en tot informar-vos…

Qu’era magia, era illusion e es talents d’apréner tostemp siguen present enes nòsti escolans, atau coma enes mèstres.

Tot aquerò qu’aprenem tamb illusion non se desbrembarà jamès!!

Un viatge arribèren es ueus ena classa, era curiositat e emocion dera mainadèra se hèc visibla e comencèren a hèr preguntes sense parar; uns cridauen, uns auti sautauen e era grana majoria s’apilotèren entà poder vèir es ueus. Un còp tornèrem ara calma, comencèrem a hèr ua ploja d’idies d’aquerò que sabíem sus es porics gracies a Janick, que mos hèc ua petita presentacion entà explicar-mos d’a on auie portat es ueus.

Ei incredibla era capacitat des escolans entà reflexionar sus causes que se mos escapen a nosati, es adulti, e questions tan simples coma: coma cuedaram aguesti ueus se nosati no èm era sua mair? Dèishen en evidéncia era importància qu’era familha à entà toti e era necessitat d’auer-la a pròp entà subervíuer. Damb aguesta e autes preguntes, podèrem trèir arguments necessaris entà enténer eth cicle vitau des porics.

Es preguntes mès freqüents que sorgiren sigueren es següents:

• Coma sabem que sonque i a porics laguens d’aguesti ueus?
• Coma les cauam?
• Guairi dies an d’éster laguens dera incobadora?
• Que passe damb es ueus que se queden dehòra?
• Neisheràn porics de toti es ueus?

Aguesta, ei sonque era ploja d’idies que auem plantejat entre toti, a partir d’aciu, anaram contestant totes es questions-problèma ath long deth projècte, observant e reflexionant sus era evolucion des ueus.

“Ditz-me quauquarren e ac desbrembarè, ensenha-me quauquarren e ac rebrembarè, hè-me participant de quauquarren e ac aprenerè!”

Confuccio, Arrepervèri Chinés