Eth tèma dera atencion e concentracion enes ahèrs escolars ei quauquarren que mos preocupe ara màger part des mèstres. Cada dia auem mès dificultats entà qu’es nòsti escolans e escolanes mos escoten, se concèntren en trabalh e non se distreiguen damb quinsevolha causa …
Òc, ei dificil mantier era sua atencion. Quin ei eth motiu? Dilhèu ei perque son
entornejadi d’estimuls de per tot e aquerò hè que se distreiguen o dilhèu per qu’an massa causes e non son capables de valorar-les ne apreciar-les. Non auem massa clares es causes, mès podem ajudar-les damb eth teatre.
Cercant en diccionari era definicion de CONCENTRACION mos ditz qu’ei fixar era atencion volontàriament sus un objècte, activitat o idia, deishant de costat es autes causes.
A QUÉ MOS AJUDE SABER CONCENTRAR-MOS?
- A conéisher e compréner eth mon que mos entornege.
- A conéisher-mos a nosati madeishi
- A desvolopar es nòsti sentits (en guardar, escotar, provar … detengudament)
- Conéisher es reaccions deth nòste còs dauant d’estimuls.
- Desvolopar era imaginacion e era sensibilitat.
- A hèr-mos mès solidaris damb es objèctes e èsters que mos entornegen.
QUINI JÒCS PODEM HÈR?
En quinsevolh moment dera classa en eth quau es nòsti escolans son distrèti podem arturar era classa e hèr bèra ua des activitats que seguissen. A mesura que se va trabalhant era mainadèra interiorize es recorsi entà mielhorar era atencion e silenci, e era classa se tornarà mès tranquilla e eth rendement mielhorarà.
- Escotar es tapatges deth nòste còs pendent uns minuts. Passadi aguesti les preguntaram qué an entenut. An de parlar d’un en un e sense prèssa.
- Dempús escotam es tapatges dera classa e contunhar damb es preguntes.
- Escotar es tapatges de dehòra. Com èren (fòrti, hloishi, discontinus, …. que mos imaginauem?
- Quines causes pòden hèr es nòtes mans?
- Qué pòden hèr es nòstes mans? Quina part dera man trabalhe mès quan escriuem? Com plaçam es dits? … Podem contunhar damb d’autes accions (pientar-se, anar en bicicleta, lauar, …)
- Hèr ua passejada mentau per cadua des parts deth nòste còs sajant que rèsten relaxades.
- Observar un objècte, sauvar-lo ena memòria e descríuer-lo damb precision e detalh.
- Pintar un quadre
- Viatjam en autobús, trèn, shivau, mòto … imaginar es diferéncies.
- Recebem un present Com ei? Com va envolopat? A laç?
E atau podem anar higent mès causes.