Entendi dindar la clau,
se durbir la pòrta
Tres pas, un grand silenci
–lo geste esperat
de la man que leis aganta.
Dindre,
maudissi l’instant
que m’as dejà pres
e aquelei que me pendràs
s’es ben verai que siás dejà aquí…
M’esmarri pas :
lei dets tiblats frustan subran
la pèu lisca dei tamborns
Puèi, sensa espèra, lei paumas entamenan
un picament descabestrat
que s’abriva e que s’enaura.
Darrier la paret
vesi teis uelhs atlantics
parpelejar
amb la meteissa cadència
quora l’un, quora l’autre.
Ges de tornar.
Mon sang tusta, descadenat
sota lei pous,
a la garganta,
entre teis ancas…
E t’imagini
m’envaïssant la pèu
coma m’envaïs ta musica :
plan planet, ritmicament.
Dedins
Senti ton manhan se tesar
coma tei dets
en dessus dei tamborns
e amb lo meteis gaubi
restontir, restontir…
Revirada: Thierry Offre